ისტორია

ფესტივალი 2009 წელს დაფუძნდა -  თბილისის, მისი კულტურის, მისი განსაკუთრებული შემოქმედებითი ატმოსფეროს პოპულარიზაციის მიზნით . ფესტივალი მერიის მიერაა დაფუძნებული. საორგანიზაციო ფორმა საჯარო სამართლის იურიდიული პირი. საიდენტიფიკაციო კოდი:

ფესტივალი დამოუკიდებელი ორგანიზაციაა. მისი პოლიტიკისა და პროგრამის ჩამოყალიბებაზე ზრუნავს ფესტივალის დირექტორი მრჩეველთა საბჭოსთან ერთად.

ფესტივალის პროგრამის განხორციელებაზე მუშაობს ფესტივალის სამუშაო ჯგუფი (10 ადამიანი) და მოხალისეების გუნფი.

ყოველ წელს  ფესტივალი არა მარტო საუკეთესო და ლეგენდარული სპექტაკლებისა და პერფორმანსების წარდგენის შესაძლებლობაა, არამედ გამოწვევის, დისკუსიისა და კამათის მცდელობა -  საკუთარ თავთან, მეგობართან, საზოგადოებასთან; კამათისა და დისკუსიის, რომელიც პატარა და მნიშვნელოვან გავლენას ახდენს ჩვენს ცხოვრებაზე, ჩვენს აზრებსა და ოცნებებზე. Aამიტომაც ფესტივალის პროგრამა განსაკუთრებული სიფრთხილითა და  მაყურებლის მიმართ განსაკუთრებული სიყვარულით დგება.

ვფიქრობთ, ფესტივალის დანიშნულებაც საზოგადოებისა და ინდივიდის მთავარ კითხვებზე პასუხის გაცემა ან მცდელობა მაინც უნდა იყოს, დებატების, დისკუსიის გამოწვევის შესაძლებლობა. ყოველი შემთხვევისთვის, სანამ მე ფესტივალზე პასუხისმგებლობა მაკისრია, ვფიქრობ, ფესტივალის პროგრამა მთლიანობაში, ისევე როგორც თვით თეატრი, დროისა და საზოგადოების სარკე უნდა იყოს, ინდივიდუალური და კოლექტიური თავისუფლების ერთ-ერთი ყველაზე მნიშვნელოვანი სივრცე.

2009 წელს ფესტივალს ორი მთავარი მიმართულება ჰქონდა: საერთაშორისო და ქართული სპექტაკლების პროგრამა.

2011 წელს ფესტივალს დაემატა პროგრამა "NEW"

2009 წლიდან დღემდე ფესტივალი თანამშრომლობს საქართველოში აკრედიტირებულ საელჩოებთან და საერთაშორისო ორგანიზაციებთან საქართველოში და საზღვარგარეთ.

2011 წელს ფესტივალი საერთაშორისო ფესტივალების ასოციაციის წევრი გახდა ხმის უფლებით; წევრი იმ ოჯახისა, რომელიც 60 წელზე მეტი ხნის წარმატებულ ისტორიას, ითვლის;  ამ პრესტიჟული ოჯახის წევრები ედინბურგისა და ავინიონის ფესტივალებია, ვენეციის ბიენალე , ისრაელის ფესტივალი, ბერლინერფესტშპილე და ასე შემდეგ.

ფესტივალის მიმართულებები:

  • საერთაშორისო პროგრამა
  • საერთაშორისო პროგრამა “NEW”
  • GEORGIAN SHOWCASE
  • გამოფენები, ტრენინგები, მასტერკლასები, შეხვედრები, სპეციალური ღონისძიებები და ფესტივალის კლუბი ფესტივალის დამატებითი ხიბლია

 

ფესტივალის საერთაშორისო პროგრამა

ფესტივალის საერთაშორისო პროგრამა დგება ფესტივალის ინიციატივითა და მიწვევის საფუძველზე მხოლოდ.

ფესტივალის საერთაშორისო პროგრამა ერთგვარი ”ხალიჩაა”, რომელიც ფესტივალის ვითარდება  ისე, რომ კულმინაციასაც მოიცავს , შედარებით დატვირთულ და მსუბუქ ნაწილს და ასე შემდეგ. დაგეგმვისას თარიღებიც ხშირად ისე განისაზღვრება, რომ ნათელი იყოს ფესტივალის აქცენტები.

ფესტივალის მთავარი პროგრამა, ვფიქრობთ, უნდა იყოს: მრავალფეროვანი, ”გამომწვევი”, ინოვაციური და მხატვრულად მაღალი ხარისხის. ხშირად  ვითვალისწინებთ ”მსოფლიო შედევრებს”, რომლის ნახვის საშუალბა ქართველ მაყურებელს მანამდე არ ჰქონია.
 

პროგრამა “NEW”

ფესტივალმა პროგრამა “NEW” წარადგინა 2011 წელს. სტარტი ამ პროგრამამ საკმაოდ რთულად აიღო. მაგრამ უკვე 2012 წლიდან  "NEW"  ერთერთი ყველაზე საინტერესო მიმართულება გახდა. პროგრამის იდეა წარმოიქმნა იმ უამრავი შეთავაზების საფუძველზე, რაც ფესტივალმა მიიღო 2009 წლიდან. ვიფიქრეთ, რომ მხოლოდ მთავარი პროგრამით შემოფარგვლა არ იქნებოდა სწორი, მით უფრო, რომ არსებობდა საფუძველი და სწორედ ამიტომ დავგეგმეთ პროგრამა სახელწოდებით ”ახალი” (NEW). პროგრამის ანალოგები ბევრია და სხვადასხვანაირად მუშაობს (ავინიონის ფესტივალის ”OFF”, ედინბურგის ფესტივალის ”FRINGE”  და ასე შემდეგ).

პროგრამა საკონკურსოა.
 

 პროგრამის მიზანია:

მოვიზიდოთ ჩვენთვის ჯერ უცნობი თეატრები და წარმოდგენები მცირე ბიუჯეტით;
გავხადოთ ფესტივალი პოპულარული ახალი წარდგენებით და არამარტო ცნობილი სახელებით , შევქმნათ ახალი საერთაშორისო ”შოუქეისი”;
შევქმნათ მრავალფეროვანი არჩევანის საშუალება;
გავზარდოთ ფესტივალის საერთაშორისო პროგრამა მცირე ბიუჯეტის საშუალებით

 

ქართული სპექტაკლების პროგრამა (GEORGIAN SHOWCASE PROGRAM)

ქართული სპექტაკლების პროგრამა ფესტივალის ყველაზე სათუთი “პროექტია” და ქართული თანამედროვე თეატრის პოპულარიზაციას ემსახურება. სპექტაკლების შესახებ წლების განმავლობაში ბევრი დაიწერა საერთაშორისო პრესაში . ქართველი მაყურებლისა და კრიტიკოსებისთვისაც არანაკლებ მნიშვნელოვანია შოუქეისის პროგრამა, რადგან ერთიანად სეზონის სრულ იმიჯს ქმნის. მაგრამ მნიშვნელოვანია ის, რომ Gეორგიან შჰოწჩასე-ი ნელ-ნელა იმკვიდრებს თავს საერთაშორისო რუკაზე; ქართული სპექტაკლების პროგრამა ხდება პოპულარული და იზიდავს მეტ მეგობარს, პარტნიორს და ნელ-ნელა აქტუალური ხდება ევროპაში.

ქართული სპექტაკლების პროგრამის შედეგად რამდენიმე სპექტაკლისა და რეჟისორის მიწვევა მოხდა საზღვარგარეთ ფესტივალებსა და თეატრებში.

ყოველ წელს ფესტივალი წარმოადგენს ქართული თეატრის ახალ სპექტაკლებს, რომელსაც ესწრება ფესტივალის დირექტორები, კრიტიკოსები, არტ დილერები, თეატრების ხელმძღვანელები ევროპის, აზიისა და ამერიკის ქვეყნებიდან.

სტუმრების გეოგრაფია: ირანი, ჩინეთი, გერმანია, ინგლისი, ავსტრია,  პოლონეთი, ლიტვა, რუსეთი, ესტონეთი, იაპონია, იტალია, კანადა, კორეა, რუმინეთი, შვეცია, საფრანგეთი, ლატვია, ნიდერლანდები, ომანი, თურქეთი, იაპონია, ავსტრია, ესტონეთი, ირანი, ჰოლანდია.

პუბლიკაციები: რუსეთი, დიდი ბრიტანეთი, ირანი, იტალია, იაპონია, ესტონეთი, პოლონეთი, ფინეთი, ინდოეთი, ჩინეთი, გერმანია, საფრანგეთი, კორეა, კანადა და სხვ.

თბილისის საერთაშორისო თეატრალური ფესტივალი დედაქალაქს მნიშვნელოვან კულტურულ, ეკონომიკურ და სოციალურ უპირატესობას შესძნეს. თბილისს შეუძლია გახდეს კულტურული ცენტრი, მოიზიდოს ადამიანები და შექმნას ის შემოქმედებითი კაპიტალი, რომლის ღირებულება განუსაზღვრელია.